لونها ... تعدلها

أولا حبيت اتكلم في ال blog ده على الألوان لعشقي ليها، وايماني بأثرها على النفس ورغم ضخامة الموضوع وأنا عارفة اني مش هاقدر الم بكل اللي بتعمله الألوان لأن ده اكيد هايصيب اللي بيقرأ بالملل، حبيت أكتبلكم بايجاز اثر المعجزة الكونية دي علينا ايه وبتمنى ده يساعدكم في اختيار الوان اللبس والديكور الصح ...

الألوان هي عالم جميل ليها تأثير عجيب على سلوك ومزاج الانسان، وعلم النفس بعد دراسات كتير اكتشف أن مزاج الانسان وسلوكه ،بيتأثر بتغير الألوان حواليه، ومن آلاف السنين كانوا بيدهنوا المباني بألوان مختلفة من غير مايعرفوا ده أثره ايه عليهم، الكلام ده كمان بينطبق على الوان اللبس اللي بنلبسها او بنشوف غيرنا لابسينها وبرضه بتأثر بشكل مباشر في سلوكنا ومزاجنا ......

ماسألتش نفسك ايه سبب تعلقك بلون معين ؟

لو لاحظت هاتلاقي ان من وانت صغير في لون معين انت متعلق بيه مابتحبش تغيره في لبسك وكل حياتك ، الأبحاث أثبتت ان الهدوم الملونة ليها علاقة كمان بالشخصية 

هتلاقي اللي بيحب الألوان الزاهية هو شخص مرح محب للحياة وأحيانا اجتماعي، 

بعكس الأشخاص اللي بيحبوا يلبسوا الغوامق بيعتبرهم العلم أشخاص بيميلوا للانطوائية وحساسين .

كل لون من الألوان ليه أثر مختلف  على الحياد من الناحية السلوكية والعلاجية في مجالات حياتنا المختلفة، وكمان ألوان الضوء المختلفة بتساعد في أنواع متعدد من العلاج.

خلينا نشوف كل لون ممكن يأثر علينا ازاي: 

# اللون الأبيض:

له أثر كبير في انه يعدل المزاج ويحسسك بالهدوء والطمأنينة 

كمان هنلاحظ أن الأطباء بيلبسوا بالطو أبيض فبيعكس المشاعر دي على المريض، وبيساعدك تهدأ لم تكون متعصب، لو لقيت نفسك متضايق بص على شيء لونه أبيض من 3 الى 5 دقايق هتحس بفرق أكيد....

كمان الضوء الأبيض مفيد في العلاج، هانلاحظ أن في أمراض كتير بتعالج بالنوع ده من الضوء وكمان بضوء الشمس ...

#اللون الأسود:

الأسود لما تشوف حد لبسه هاتحس ناحيته بالهيبة والرهبة ده شعور طبيعي ، محبي اللون ده أو اللي بيفضلوا يدخلوه في كل حاجة في حياتهم بيكونوا أصحاب شخصية انطوائية وغامضة.

#اللون البترولي أو درجات لون البحر:

لون ممتاز بيساعد على التأمل والابتكار، ولو جربت تركز في اللون ده في خلال اجتماع أو مكان المفروض تنتج فيه فكرة جديدة هاتلاقي الموضوع بقى أسهل كتير، من الآخر اللون ده نقدر نقول عليه بيساعد على ( التفكير الابداعي)، بنصح بيه كل من له علاقة بأشكال الفنون المختلفة.

#اللون الأزرق الصريح:

اللون الأزرق بيساعدنا نسيطر على المواقف والمشاعر،والاستقرار النفسي، حلو اننا نلبسه مع الأشخاص العصبيين( اتعملت تجربة على أطفال عدوانين السلوك، واتحطوا جوه فصل مليء باللون الأزرق والأبيض، ولاحظوا الفرق في سلوك الأطفال والهدوء النسبي اللي ساد المكان).

#اللون الأخضر: 

اللون ده هو لون الحياة والراحة النفسية، حلو للي بيعانوا من الاكتئاب والاحباط،  علشان كده الأطباء بيوصوا بالأماكن الخضرا والطبيعة للتغلب على المشاكل النفسية وتخيلوا كمان انه بيقلل من الشعور بالألم للي بيعاني من السرطان وأمراض المعدة ....

#اللون الأصفر:  نقدر نقول عليه أنه لون السعادة،  مرتبط بالشمس ومشاعر الفرح والبهجة، بيساعد في تنشيط الذاكرة وتصفية الذهن والابتكار برضه...

هو كمان بيساعد على بناء أنسجة الجسم وبيشفي من أمراض الجهاز التنفسي والبرد والحلق وغيرها....

هو أكثر الألوان اللي بتحتفظ بيه الذاكرة لو نلاحظ ان أغلب الأوراق اللي بندون عليها الملحوظات بتبقى باللون الأصفر وده سببه طبعا انها تترسخ في ذهننا أكتر.

#اللون البرتقالي: 

البرتقالي والأحمر والأصفر مشتركين لحد كبير في أثرهم على المزاج ، البرتقالي بيساعد على التنشيط العقلي والحماس والابداع والسعادة ، وبيمنع الشعور بالهبوط والنعاس وبيمنع كل المشاعر السوداوية....

#اللون الأحمر: يخليك تتخلص من الاحساس الدايم بالاجهاد والميل للنوم، وهو فعلا لون محفز للجسم 

من ناحية تانية بيساعد اللون ده في علاج البرود الجنسي للأثر اللي بيعمله وبيضفيه  على الجسم في حال وقوع العين عليه.

# اللون البنفسجي :

مهدئ عام للمشاكل النفسية والعصبية ، وهو لوني المفضل ... :) 

كمان اللافندر زهرة بنفسجية اللون وهي معروفه بأثرها المهدئ للمزاج .

#اللون الوردي(البينك):

بيأثر على الجسم وبيرخي العضلات وبيهدي الأشخاص العدوانين والعنيفين، وبيستخدم في السجون ومراكز الأبحاث، اللون البينك حلو جدا لغرف النوم ولو نلاحظ لما نلبسه في الفساتين والملابس بتبقى الصفة العامة للي لابسه ( انه شخص هادئ رومانسي )

                    في النهاية أحب أقول ..   حاول تلونها   .. أكيد هاتعدلها

مش اصطمبة واحدة... جسم الساعة الرملية

                                                       جسم الساعة الرملية 

من أجمل أشكال الجسم، صاحبته بيكون وسطها نحيف والجزء العلوي والسفلي عندها متساويين تقريبا، (مارلين مونرو) من أشهر صاحبات الجسم ده، مش معنى أن الجسم ده متناسق جدا عن بقية الأجسام، يبقى يلبس اللي عاجبه، لا لازم يبقى ملتزم زيه زي بقية أشكال الأجسام بلبس معين. 

*التنورة (الجيبة) المناسبة لجسم الساعة الرملية:

-أكثر المشاكل اللي بتواجها صاحبات الجسم ده، ان من صغر وسطهم دايما وسط الجوب أو البنطلون بيبقى واسع ومن عند الهانش مضبوط عليهم بالتالي الحل بيبقى تضيق الوسط.

-الجيب الاستريت أو (البنسل) واللي على شكل حرف A، لأنها بتخلي انحناءات جسمك متناسقة وقليلة خصوصا مع الألوان الغامقة.

-بلاش الكرانيش في الجيبات، ولا الجيوب الكبيرة في الجناب أو ظهر الجيبة .

-ياريت تلبسي بلوزة قصيرة مع حزام علشان يبرز الوسط ويحدده، وجوب سادة.

*نماذج الفساتين المناسبة للجسم ده: 

*البنطلوب المناسب:

-بلاش الجينز اليوزد ( اللي فاتح من وسط الرجل وغامق من الجناب).

-موديل (البوت-كت) هو أنسب موديل واللي بيبقى مظبوط عند الأرداف، وواسع شوية عند الرجل من تحت. 

-بلاش الوسط الساقط (LOW WAIST) .

* الجواكت اللي تليق على جسم الساعة الرملية:

-الجاكيت المظبوط على الجسم.

-بلاش الجواكت الواسعة عند الوسط، علشان هتبقى شبه الصندوق .

-لو الجاكيت طويل (بالطو)، خليه بوسط مظبوط، بفتحة V عند الرقبة  وحزام عريض فوق الوسط علشان تباني أرفع .

-الأحسن تلبسي الأكمام من الستايل المنقوش علشان تدي لأكتافك عرض .

*نصايح عامة:

بلاش الأقمشة الناشفة زي (الجباردين)، وياريت تختاري قماش ناعم وانسيابي زي         (الحرير-الجيرسي-الجل).

لازم المقاسات اللي تلبسيها تكون مظبوطة على الجسم، أو أوسع درجة واحدة، بالذات في الجيب وبلاش الهدوم الضيقة.

مش اصطمبة واحدة.... الجسم الكمثرى

كل واحدة فينا ليها شكل جسم ومقاييس مختلفة، وأكيد ده سبب في إن مش كلنا بيليق علينا نفس ستايل اللبس مثلا.

والاختلافات دي عندنا كمصريين  مابتبقاش اصطمبة واحده يعني مثلا:

بره ممكن تلاقي مقاسات اللبس M-L-XL  مظبوطة على الكل بمعنى ان صاحبات المقاس L  مثلا كلهم هايبقى المقاس اللارج مظبوط عليهم ، غير عندنا وده اللي اقصده لو في بلوزة مستورده من بره مثلا وجبنا ثلاث بنات كلهم مقاسهم لارج، هانلاقي الاولى محتاجة تقصر الاكمام وحرف البلوزة، والتانيه محتاجة تضيقها من عند الوسط، والثالثه ممكن تحتاج ان الاكمام تكون أوسع علشان تناسب عرض دراعتها.

  طبعا ده مش دايماً، ومش كل الناس كده، بس أغلب الأجسام المصرية بيبقى فيها بعض الخلل في المقاييس.

من الاخر.. الكل أكيد بيلاحظ ان جسم الأنثى المصرية في الأغلب مش بيتناسب مع الملابس الجاهزة التي تتبع المقاسات الغربية، لأن ليه مقاييس مختلفة.

قررت أكتبلك بشكل مفصل عن أشكال الجسم،  وازاي تقدري تتعاملي مع نوع وشكل جسمك، في مجموعة مقسمة من التدوينات، في شكل حلقات، كل مرة هاتكلم فيها عن واحد من الاشكال دي.

الجسم الكمثرى   ........ Pear Shape

هو أشهر أشكال الأجسام وأكثرهم أنوثة وجمال، ومعظم النجمات العالميات جسمها على شكل كمثرى بس مابيظهرش بشكل واضح  لمحافظتم على وزنهم ،

زي (كيم كرديشيان، بيونسيه، كريستينا اجوليرا، جينيفر لوبيز وتايرا) جسم شبه الأجسام اللاتينية .

يعني الجزء اللي في أسفل الجسم (الأرداف والأفخاذ) أعرض من الجزء الأعلى         (الصدر والأكتاف) والوسط بيكون صغير ..

البلوزات والتوبات المناسبة للجسم الكمثرى:

-لازم مايكنش ضيق أو استرتش لأنه هايبين صغر النقطة دي .

-لازم يكون متوسط الوسع.

-بلاش تلبسي البلوزات والتوبات الياقة حرف V ولا اللي فيها قصة عند الصدر.

-بلاش البلوزات الطويلة قوي لأنها هاتظهر الأرداف اللي بنحاول نداريها.

يفضل تلبسي قمصان شبة القمصان الرجالي  وبياقة،  وبلاش فتحة الياقة الدائرية .

الفساتين المناسبة للجسم ده:

-حاولي تلبسي الفساتين اللي بتتربط حول الرقبة، أو اللي حملاتها عن حافة الأكتاف ومن غير أكمام ، لان دي بتزود عرض الكتف، وال strapless  لأنها بتدي منظر جميل للجسم الكمثرى.

-ممكن يكون الفستان بقصة الأمبير "واسع من تحت كلوش على شكل حرف A".

-لو انت مليانة بشكل ملحوظ ، بلاش تلبسي الفساتين الضيقة والمجسمة أو ديل السمكة ، وبلاش الفساتين الليكرا (الاسترتش) لأنها بتظهر الأفخاذ بشكل أعرض .

البنطلون المناسب للشكل ده من الأجسام: 

 -بلاش البناطيل اللي فيها تفاصيل كتير ، أو الستان والجلد .

-يفضل يكون فيه وسط ومزبوط على الجسم وبلاش البناطيل السكيني.

الجوب أو التنورة المناسبة:

-يفضل ان وسط الجوب تكون عاليه لأنها هاتساعدك تخبي ضخامة أفخادك، وتكون نازلة بوسع (فضفاضة).

-بلاش تكون قصيرة.

-ماتكونش البناطيل قصيرة ولا الجيبات قصيرة ، لأنها هاتظهرك قصيرة. 

- لازم الجيبة تكون سادة، أوبخطوط طول ،أو لو منقوشة يبقى أضغر نقشة ممكنة.

الجاكيت المناسب للجسم الكمثرى :

-لازم يكون بكتافات.

-يفضل يكون بصفين زراير، والوسط مجسم.

-لازم طول الجاكيت يغطي الهانش، وبلاش الجواكت القصيرة.

-بلاش الجواكت الواسعة.

نصايح عامة :

ركزي دايما ان كل تفاصيل وزحمة اللبس تكون في الجزء اللي فوق، زي الفواتح، واللبس اللامع، والنقشات، والخطوط العرضية، والتتطريزات والدرابيهات.

وبلاش تلبسي خامة الجيرسيه،لأنها الخامة اللي بتفضح أي عيوب في الجسم .

وكمان حاولي تلبسي اكسسوارات كبيرة وكوليهات، وبلاش أحزمة عريضة.

حاولي ان الشوز اللي كعبه عالي هو اللي يبقى رفيق قدمك، لأنه بيساعد ساقك تبان أطول وأرفع .

مش اصطمبة واحدة ....الجسم المسطرة

كل واحدة فينا ليها شكل جسم ومقاييس مختلفة، وأكيد ده سبب في إن مش كلنا بيليق علينا نفس ستايل اللبس مثلا.

والاختلافات دي عندنا كمصريين  مابتبقاش اصطمبة واحده يعني مثلا:
برة ممكن تلاقي مقاسات اللبس M-L-XL  مظبوطة على الكل بمعنى ان صاحبات المقاس L  مثلا كلهم هايبقى المقاس اللارج مظبوط عليهم ، غير عندنا وده اللي اقصده لو في بلوزة مستورده من بره مثلا وجبنا ثلاث بنات كلهم مقاسهم لارج، هانلاقي الاولى محتاجة تقصر الاكمام وحرف البلوزة، والتانيه محتاجة تضيقها من عند الوسط، والثالثه ممكن تحتاج ان الاكمام تكون أوسع علشان تناسب عرض دراعتها.

  طبعا ده مش دايماً، ومش كل الناس كده، بس أغلب الأجسام المصرية بيبقى فيها بعض الخلل في المقاييس.


من الاخر.. الكل أكيد بيلاحظ ان جسم الأنثى المصرية في الأغلب مش بيتناسب مع الملابس الجاهزة التي تتبع المقاسات الغربية، لأن ليه مقاييس مختلفة.

قررت أكتبلك بشكل مفصل عن أشكال الجسم،  وازاي تقدري تتعاملي مع نوع وشكل جسمك، في مجموعة مقسمة من التدوينات، في شكل حلقات، كل مرة هاتكلم فيها عن واحد من الاشكال دي.

الجسم المسطرة.. الموزة Ruler

صاحبة الجسم شكل المسطرة بتتميز بصغر الصدر والأفخاذ (الهانش)، وشكل الجسم عامة ً يشبه المسطرة (الموزة)، لأن مافيهوش أي شيء بارز أو محدد.

الألوان المناسبة للفئة دي:-

الأخضر الزيتوني أو الزيتي.

- الأخضر التفاحي.
- لون الصدأ (النحاسي).
- الباذنجاني.

- الأبيض و تجنبي اللون الأوف وايت.

الجاكيت المناسب للفئة دي:-

- لازم يكون مظبوط جدا ً على الجسم، لا ضيق ولا فضفاض أو واسع.
- يكون فيه زرار واحد بس بمستوى السرة.

التوب أو القميص المناسب للجسم المسطرة:-

- لازم دايما ً يكون لون التوب أفتح من لون اللبس اللي في الجزء اللي تحت من الجسم.
- فتحة الصدر تكون دائرية أو تغطي الرقبة high neck.
- من غير أكمام.

- لازم يكون مظبوط (لا ضيق ولا واسع).

البنطلون المناسب للجسم ده:-

مظبوط و واسع شوية.
- واسع من تحت علشان يوازن الجسم (الأكتاف والأرجل).

التنورة المناسبة لهذه الفئة:-

 
الجوب تكون على شكل حرف A ، علشان تداري التفاصيل اللي مش موجودة اصلا، لأن عدم وجودها يعتبر عيب في الجسم.

 

نصائح عامة:-

-ماتخافيش انك تلبسي خامة فيها لمعة أو جليتر.

-لما تلبسي الجاكيت خليه مفتوح علشان يظهر الوسط (الخصر).

- يفضل انك تلبسي القمصان من غير ياقة.

- تقدري كمان تلبسي التوبات بفتحة V خفيفة.
 

- ياريت تلبسي الجاكيت طويل علشان يظهر طول جسمك.