مش اصطمبة واحدة ...الجسم التفاحة

                                            
في البداية أحب أكلمكم عن إن كل واحدة فينا ليها شكل جسم ومقاييس مختلفة، وأكيد ده سبب في إن مش كلنا بيليق علينا نفس ستايل اللبس مثلا.

والاختلافات دي عندنا كمصريين  مابتبقاش اصطمبة واحده يعني مثلا:
برة ممكن تلاقي مقاسات اللبس M-L-XL  مظبوطة على الكل بمعنى ان صاحبات المقاس L  مثلا كلهم هايبقى المقاس اللارج مظبوط عليهم ، غير عندنا وده اللي اقصده لو في بلوزة مستورده من بره مثلا وجبنا ثلاث بنات كلهم مقاسهم لارج، هانلاقي الاولى محتاجة تقصر الاكمام وحرف البلوزة، والتانيه محتاجة تضيقها من عند الوسط، والثالثه ممكن تحتاج ان الاكمام تكون أوسع علشان تناسب عرض دراعتها.

  طبعا ده مش دايماً، ومش كل الناس كده، بس أغلب الأجسام المصرية بيبقى فيها بعض الخلل في المقاييس.


من الاخر.. الكل أكيد بيلاحظ ان جسم الأنثى المصرية في الأغلب مش بيتناسب مع الملابس الجاهزة التي تتبع المقاسات الغربية، لأن ليه مقاييس مختلفة.

قررت أكتبلك بشكل مفصل عن أشكال الجسم،  وازاي تقدري تتعاملي مع نوع وشكل جسمك، في مجموعة مقسمة من التدوينات، في شكل حلقات، كل مرة هاتكلم فيها عن واحد من الاشكال دي.

الجسم التفاحة: 
من هي صاحبة الجسم التفاحة وايه هو شكل الجسم ده:
جسمها بيكون صاحب بروز أو كبر الصدر، ووسط قصير، وأفخاد رشيقة (رفيعة)، ورجلين جميلة، وأحيانا أكتاف عريضة وعلشان كده بيقولوا عليه تفاحة.

*الألوان اللي بتناسب الجسم التفاحة :
-الأزق الملكي ،لون البحر، التركواز

-البنفسجي، العنابي، البنفسجي المحمر

-بلاش الاخضر الزيتي
-بلاش الألوان الفاتحة جدا والصارخة والبسي الوان غنية وداكنة



*الجاكيت المناسب للجسم ده :
-يكون فيه تجسيم عند الوسط وينتهي عند اول الفخد (هانش)
-حلو انه يكون من غير ياقة وفيه سوسته من الأمام  وممكن يكون مفتوح مابيتقفلش

*التوب أو القميص أو الفستان المناسب للجسم التفاحة :
-ماينفعش اللبس يبقى فضفاض ، ولازم يبقى مظبوط على الجسم
-فتحة الصدر تكون دائرية او على شكل الحرف V
-بلاش تلبس القمصان اللي فيها ياقات
-حلو لو طول الكم 3/4

*البنطلون المناسب :
يبدأ من عند عظمة الفخد أو فوقه بشوية
يكون فيه وسع من تحت ، خلي بالك أنه مايكنش واسع جدا من تحت لأن الهدف الأساسي  من الوسع  انه يوازن الجزء اللي تحت من الجسم مع الجزء اللي فوق .

*الجيبه المناسبة للجسم التفاحة:
أنسب جوب للفئة دي هي اللي نازلة على كلوش واسع من تحت

نصيحة عامة : ان كل اللي تلبسه (صاحبة الجسم التفاحة) من توبات وقمصان وجواكت لازم يكون فيه تجسيم عند الوسط وتبرزه.

أسود لابد منه

كثير مننا بيتعرضوا لحضور مناسبة وفاة وبيبقى الموضوع مفاجئ ومش معمول حسابه كما المناسبات السارة يعني أكيد مش بنعدله وفي كثيرين مننا اصلا ماعندوش في دولابه ملابس سوداء.

باعتذر اني باتكلم في موضوع زي ده بس طبعا بحكم شغلي تطرقت اليه لمساعدة الكثير من اللي حواليا اتعرضوا لمواقف زي دي .




أولا: خلينا نتكلم انه من عاداتنا اننا نلبس في العزا (لون اسود) طيب ده سببه ايه ومعناه ايه..

في العصور الأولى اعتقد الناس ان روح المتوفى تدخل الجسد .وبيقولوا العلماء ان الانسان الأبيض البدائي كان بيدهن جسمه باللون الأسود في الجنازات علشان يحجبوا الأرواح عن أجسادهم.

والعادات دي هي اللي خلت الناس بعد كده يلبسوا اسود على المتوفى لعدة أسابيع بالرغم من معرفتهم وايمانهم انها خرافه، وفضلت عاده تتبع حتى الأن.

عموما وفي كل الحالات هي عادات وتقاليد البشر بنلتزم بيها لأننا عايشين بين البشر دي.وبنعتبرها احترام وتعبير عن هذه الحاله من الحزن على المتوفى (رغم طبعا ان الحزن في القلب زي ما بنقول).

في البداية في حاجات لازم تلتزم بيها الست في مظهرها وهي رايحة العزا:
-

لازم قبل أي حاجه يكون دولابك فيه طقم أسود مش عريان او مبتذل يعني حشمة ومناسب.



-المكياج وهو أهم نقطة حاولي تستغني عنه، او لو مضطرة حاولي يكون قليل جدا وابتعدي عن استخدام الالوان الزاعقة.

- حاولي تقللي الحلي (الاكسسوارات) اللي هاتلبسيها يعني أقل حاجة ممكنه برضه.
 

 - مش لازم الايشارب يكون هو كمان أسود ممكن يكون أي لون فاتح بعيدا طبعا عن الألوان الفاقعة والزاهية.

.وفي النهاية هي حقيقة ماينفعش نتعامل معاها باستهتار، اتكلمت فيها لأننا بنشوف كثير 

من الأخطاء دي بتحصل، بس احتراما لعاداتنا وتقاليدنا نحاول ان يكون المظهر غير مبتذل ومبهرج في العزاء

وأخيرا الدوام لله .





الى لقاء قريب... لآراكم أو لأي سؤال الكتابة في التعليقات ...شكرا

فستان+ شوز مناسب = بنوتة "آخر ألاجه"

الشوز "الجزمة" لها دور أساسي جدا في انها تكمل ستايلك وطلتك وخصوصا في المناسبات أو الحفلات .

وهتفضل الشوز "الجزمة" اللمسة المكملة والضرورية لأناقة المظهر بشكل عام.

وفي رأيي انه من الأخطاء الشائعة إن البنت القصيرة هي الوحيدة اللي ينفع تلبس كعب (لا والف لا).

ان كنتي طويلة او قصيرة البسي كعب لان فعليا الكعب العالي هو المكمل الاساسي لشكل الأنثى، وفي لبس كتير ممكن تدمريه لو لبستي معاه شوز فلات (بدون كعب).



ولم تيجي تشتري الشوز خلي بالك من كذا نقطة :

الشوز مش بس اكسسوار مكمل للفستان بس كمان بيضيف للفستان مش بينقص منه.

يفضل انك تختاري لون الشوز بلون فستانك أو لون قريب منه، او لو الفستان داخله كذا لون هاتي الشوز بأحد الألوان دي .

خلي بالك ان الكعب العالي اللي هتلبسيه يكون مقارب الكعوب اللي لبستيها قبل كده أو زيها علشان انتي رايحة تتبسطي مش رايحة تركزي ان فقرات ظهرك واجعاكي، يعني من الآخر جربي الشوز أكثر من مرة وامشي بيها قبل ما تشتريها .

افتكري دايما ان النعومة والبساطة هي عنوان الأناقة، والقاعدة دي بتطبق برضه على الجزم . لامؤاخذة .



لو هاتفاضلي بين الجمال والراحة، اختاري الشوز اللي تريحك وتكون عملية وحاولي تختاري النوعية الجيدة من حيث الصنع يعني (مصنوعة بطرق مدروسة ومواصفات عالية).

في النقطة دي بالذات هاتخدي بالك ان معظم الناس بيحبوا يشتروا من البراندات (Brands) علشان يضمنوا جودة عالية وراحة اكيدة واكيد تصميم مناسب.



وده شكل الشوزات التي اعشقها واحب ان اقتنيها :





















































في المرات الجاية هاتكلم اكتر عن استخدامنا للإكسسوارات (السكارف، الحلي، الشنط، الشوز ...) تابعوني ...
لآرائكم أو لأي سؤال الرجاء الكتابة في التعليقات.. شكرا

إلبسي هذا الشتاء.. بربرق

اكيد كتير مننا لاحظ ان الفساتين المعدنية موضة وظاهرة السنة دي، ظهرت بيها فنانات كتير في مناسبات متعددة، بالتالي هنعرف ان الفساتين اللامعة هي موضة شتاء 2015، علشان تضيف للأنثى طلة ساحرة بتخطف الانظار، مع العلم انه ماقتصرش بس على السوارييه او الحفلات المسائية، بس كمان للخروج الصبح وللشغل .

وده بيكون في الفستان كله او على الاكتاف، او على الذيل وفتحة الرقبة وفي الكمين وذيل الفستان، والشتا ده الفساتين بتتميز بالترتر والاستراس والكريستال والطباعات اللامعة باللون الفضي او الذهبي.














.




واكثر الالوان موضة السنة دي خريف/شتاء 2015، واللي بيتربع على عرشها هو اللون الاخضر الغامق، وطبعا اللون ده بيتناسب جدا مع الفترة دي من السنة، الاخضر بكل درجاته دارج، زي مثلا الاخضر الزرعي بلون الشجر، والاخضر الطيني والزيتي